Адам баласының өмір жолы әртүрлі. Біреу үлкен қалада бизнесін дамытса, енді бірі ауылда өз ісін бастап, туған жерінің гүлденуіне үлес қосады. Осындай жүрегі кең, балажанды жанның бірі-көп балалы отбасында өсіп-өнген кәсіпкер, іскер азамтша Роза Шалбайқызы Қасымбекова. Ол 1971 жылы — 21 қаңтарда Кентау қаласында дүниге келген.1988 жылы мектеп бітірген соң дәрігер болсам деген алдына мақсат қойып, медициналық колледжге оқуға түседі. Одан әрі жоғары білім алу үшін Шымкет қаласындағы Достық университеттінде оқуын жалғастырады. Аталмыш оқу ордасын бітірген шақта еліміз Тәуелсіздік алып, тарихта «90 — жылғы тоқырау» деп аталып кеткен кезеңге тап келеді. Дәл осы сәтте еліміздегі көптеген кәсіпорындар мен зауыттар жұмысын тоқтатып, көпшіліктің жұмыссыз қалып, жұмыс істейді дегендердің өзі 4-5 айлап жалақы алмайтын кезеңді бастарынан өткеріп жатқан еді. Заманның өзгергенін, қоғамның мүлде басқа арнаға бет бұрғанын бағамдаған Роза Шалбайқызы сол кезеңдегі еті тірі замандастары секілді кәсіпкерлікке бел буды. Басында шағын кәсіптен бастаған ол бірте-бірте тәжірибе жинап, бизнестің қыр-сырын меңгере бастады. Алғашында ауыл тұрғындарына қажетті өнімдер сатумен айналысты. Кәсіпкерліктегі табандылығы мен адалдығы оның ісін өрге домалатты. Бизнес саласындағы 27 жыдық ізденіс пен еңбекқорлық Роза Шалбайқызын көптеген табыстарға жетеледі. Бірақ оның жүрегінде әрдайым балабақша ашу арманы жатты. Ол өз еңбекқорлығы мен табандылығының арқасында талай қиындықты еңсеріп, бүгінде ауыл балаларына арналған «Тенгиз» деп аталатын 150 орындық заманауи бөбекжай балабақшасын ашып отыр.
Қарапайым ауыл отбасында дүниеге келген бүгінгі кейіпкеріміз көпбалалы отбасында өскендіктен, кішкентай кезінен жауапкершілік пен еңбектің қадірін біліп өсті. Анасының бала тәрбиесіндегі мейірімділігі мен қамқорлығы оған ерекше әсер етті. «Анам әрдайым балалардың болашағы жарқын болуы үшін білім мен тәрбие маңызды екенін айтатын. Сол сөздер менің жүрегімде мәңгі сақталып қалды», – дейді кәсіпкер.
Ауылдағы аналармен сөйлескен сайын, олардың балабақша тапшылығы мәселесін жиі қозғайтынын байқады. Ана жүрегімен бұл мәселені терең түсінген ол, ауыл балаларына қолайлы жағдай жасау үшін балабақша ашуға бел буды.
Мемлекеттік қолдау бағдарламаларын зерттеп, жергілікті билікпен бірлесіп жұмыс жасады. Көп ұзамай, балабақша салу үшін қажетті қаржы көздерін тауып, құрылыс жұмыстарын бастады. «Көз қорқақ, қол батыр» деген рас екен.
Бүгінде 150 орындық екі қабатты балабақша ауыл балалары үшін үлкен қуаныш сыйлап отыр. Мұнда заманауи ойын алаңдары, дамытушы бағдарламалар, ыңғайлы жатын бөлмелер қарастырылған. Балабақшаның ашылуы тек ата-аналар үшін ғана емес, ауыл экономикасы үшін де маңызды болды. Себебі бірнеше адамға жаңа жұмыс орны ашылды.
Балабақша – тек тәрбиелеу мекемесі ғана емес, балаларға арналған екінші үй іспетті. Мұнда әр бала өз үйіндегідей жайлы сезінеді. Балабақшаның ішкі кеңістігі балалардың қауіпсіздігі мен дамуын ескере отырып жасақталған. Педагогикалық ұжым да ерекше қамқорлықпен іріктелген, себебі ата-ана үшін әр баланың алаңсыз, бақытты балалық шақ кешуі маңызды.
Балабақшада инновациялық білім беру тәсілдері қолданылады. Балалар ойын арқылы оқып, шығармашылық қабілеттерін дамытады. Сонымен қатар, денсаулыққа пайдалы тамақтану, физикалық белсенділік, психологиялық қолдау да басты назарда.
Кәсіпкер әйел жетістігінің басты құпиясы – еңбекқорлық пен мейірімділік. Ол әрбір істі жүрекпен атқарып, қоғамға пайдасын тигізуді мақсат етеді. «Бизнестің ең үлкен жетістігі – адамдарға пайда әкелу. Менің мақсатым – ауылдың гүлденуі мен балалардың бақытты болуы», – дейді Роза Қасымбекова ағынан жарылып. Ақиқатында балабақша тек ғимарат емес, ол — болашаққа салынған инвестиция. Осы жолда жасаған қадамы балалардың бақытты балалық шағына ғана емес, тұтас ұрпақтың болашағына жарық сыйлайды. Отбасы – адам өміріндегі ең маңызды құндылықтардың бірі. Өмірдің түрлі сынақтарында қол ұстасып, бірге алға ұмтылған жандар ғана нағыз бақытқа жетеді. Осындай жарасымды жұптың бірі – кәсіпкер Роза мен оның асыл жары Мұхтар Сүлейменов. Роза мен Мұхтар 1997 жылы шаңырақ көтерді. Олар бір-біріне тірек болып, ортақ мақсаттарына бірге жетуді басты қағида ретінде ұстанды. Бүгінде бұл отбасы Мұхамеджан, Бекжан, Балжан және Тенгиз есімді үш ұл, бір қыз тәрбиелеп отыр. Мұхамеджан құқық қорғау органдарында еңбек етсе, Бекжан кәсіпкер, Балжан дәрігер болса кенжесі Тенгиз 10 сыныпта оқиды. Балаларының бойына адалдық пен еңбекқорлықты сіңіріп, оларды өмірге сенімді, қайсар азамат етіп өсіруде.
Розаның өмірлік жары Мұхтар – мал шаруашылығымен айналысатын тәжірибелі кәсіпкер. Ол ауыл экономикасын дамытуға өз үлесін қосып, халықты сапалы өніммен қамтамасыз етуде. Мұхтардың қолдауы мен қамқорлығы Розаның кәсіпкерлік жолындағы сенімді серігіне айналды. Роза бала тәрбиесіне жастайынан ерекше көңіл бөліп, ауылдағы бүлдіршіндер үшін сапалы білім мен тәрбие ордасын ашуды армандады. Бұл арманын жүзеге асырып, бой көтерген балабақшаға кенже ұлы Тенгиздің атын берді. Қазір бұл мекеме ауыл балаларының дамуына мүмкіндік беретін маңызды білім ордасына айналды.
Сүлейменовтер отбасы тек кәсібилігімен емес, өзара сыйластық пен мейірімділіктің жарқын үлгісімен де ерекшеленеді. Олар үшін басты байлық – отбасы, ал жетістік – маңдай термен келетін еңбек нәтижесі.
Роза мен Мұхтардың өмір жолы – кәсіп пен отбасынын үйлесімді алып жүруге болатынын дәлелдейтін жарқын мысал. Бұл жанұяның өмір жолдары көпшілікке жігер беріп, ауылдағы кәсіпкерлікті дамытуға талпыныс жасайтын жандарға шабыт сыйлайтыны анық.Роза Шалбайқызы бизнес бастаймын деген әйелдерге ешқашан қорықпауға кеңес береді. «Қандай жағдай болмасын, өз мақсатыңнан таймау керек. Егер шын жүректен бір істі қаласаң, соған жетудің жолын табасың», – дейді кәсіпкер.Бүгінде ол тек кәсіпкер ғана емес, қамқор ана, ауылдағы әйелдерге үлгі болар тұлға. Ауданымыздағы іскер әйелдердің көшбасшысы оның еңбегі мен бала тәрбиесіне деген сүйіспеншілігі ауылдың болашағына үлкен үлес қосып отырғаны сөзсіз. Роза секілді іскер, қолы ашық, туған жеріне деген сүйіспеншілігі жоғары азаматшалар ортамызда көбейген сайын ауылымыздың ажары арта беретіні ақиқат.
Кәдірхан Маханбет.