Білім беру саласы үнемі даму мен жаңашылдықты талап етеді. Заманауи қоғамның сұраныстарына сай білікті, шығармашыл әрі жан-жақты ұстаз – сапалы білімнің негізі. Ұстаздың кәсіби өсуі тек жеке дамудың көрсеткіші ғана емес, сонымен қатар оқушылардың білім сапасына, мектептің беделіне және жалпы білім беру жүйесінің жетістігіне әсер ететін маңызды фактор.
Қазіргі таңда біліктілікті арттыру курстары, семинарлар, шеберлік сыныптары, тәжірибе алмасу платформалары мұғалімдердің кәсіби деңгейін жетілдірудің негізгі құралдарына айналды. Бұл процесте білім беру саласындағы инновациялар мен озық педагогикалық тәжірибелерді меңгеру ерекше рөл атқарады. Осы мақалада ұстаздардың кәсіби өсуінің маңызы, оның оқыту үдерісіне әсері және тиімді дамыту жолдары талқыланады.
М.Шаханов атындағы жалпы білім беретін мектептің 21 қараша 2024 жылғы әдістемелік көмек күні аясында «Мектептен мектепке» жобасы бойынша біздің мектептің бірнеше пән мұғалімдері қатысты. Осы шараға мектептен М.Ахмет, М.Тастемір, К.Нұрбекова, Р.Раманқұлова, Ә.Сериева, Г.Исаева, А.Кенжеева, А.Рысбай, Ж.Төлегенова, М.Мылтықбай, Ж.Канаева, І.Әжібекова, Н.Қырықбаева, Б.Мақаш сынды ұстаздар өз тәжірибелерін ортаға салды.
Мұхтар Шаханов атындағы мектепте тәжірибе алмасу барысында біздің мектептің ұстаздары жаңа интеллект жүйесіне негізделген сабақтар өткізді. Бұл әдістемелік күн оқыту процесіне заманауи технологияларды енгізу, оқушылардың шығармашылық қабілеттерін дамыту және сыни ойлау дағдыларын қалыптастыруға бағытталған ерекше шара болды.
Мұғалімдер жаңа интеллект жүйесін қолдана отырып, оқыту әдістерін жетілдіруді және оқушылардың қызығушылығын арттыруды мақсат етті. Әр сабақта білім беру үдерісі интерактивті құралдармен, инновациялық тәсілдермен толықтырылып, оқушылардың белсенді қатысуына негізделді. Бұл сабақтарда оқушылар теорияны тек меңгеріп қана қоймай, оны тәжірибе арқылы қолдану мүмкіндігіне ие болды.
Олардың арасында бастауыш сынып мұғалімі Р.Раманқұлова 4 «в» сыныбында «Үш сандарға көбейту алгоритмі» тақырыбында сабақты цифрлық визуализация арқылы өткізіп, оқушыларға есептерді шешуді жеңілдететін жаңа тәсілдерді ұсынды. Сабақ барысында оқушылар жаңа әдіс-тәсілдер арқылы үш санды көбейту процесін түсініп, есеп шығаруда өздерінің дағдыларын шыңдады. Мұғалім сабақты қызықты етіп ұйымдастырып, балалардың белсенді қатысуын қамтамасыз етті, оларға теорияны практикамен ұштастыруға мүмкіндік берді.
Ал Ә.Сериева 3 «в» сыныбында «Түбір мен қосымшаның жазылуы» сабағында оқушылардың сауаттылығын арттыру үшін интерактивті жаттығулар мен топтық жұмыстар ұйымдастырды. Ол оқушыларды сөздер мен олардың құрамындағы түбір мен қосымшаның дұрыс жазылуы бойынша теориялық біліммен таныстырып, жаттығулар мен ойындар арқылы оқушылардың дұрыс жазу дағдыларын жетілдірді. Бұл тәжірибе алмасу барысында мұғалімдер бір-бірінің әдіс-тәсілдеріне қызығушылық танытып, білімдерін жетілдіруге мүмкіндік алды. Әр ұстаз өз сабағында тиімді әдістерді қолдана отырып, оқушылардың пәнге деген қызығушылығын арттырды.
Бұл тәжірибе алмасудағы басты мақсат-баланы бағалау әдісін жетілдіру болды. Оқушыларды бағалауда жаңа жүйе енгізіліп, әрбір баланың білім деңгейін жинаған баллдары бойынша бағаланып отырды. Мысалы, егер оқушы 10 баллға жетсе, ол «5» деген бағамен бағаланып, егер 7-8 балл жинаса, «4» деген баға қойылды. Бұл бағалау жүйесі оқушының білім деңгейін нақты көрсетуге мүмкіндік береді. Оқушылардың жетістіктерін бағалаудың тиімді құралы ретінде дескрипторлар кестесі құрылды. Бұл кесте оқушының жұмысының әртүрлі аспектілерін, оның ішінде тапсырмаларды орындау дәлдігін, ережелерді қолдану, шешімдерді түсіндіру қабілетін және топтық жұмыстағы белсенділігін бағалауға мүмкіндік береді.
Бағалау жүйесі төрт деңгейге бөлінген: жоғары, орташа, төмен және қанағаттанарлық. Әр деңгей нақты критерийлермен белгіленеді, бұл бағалауды объективті әрі әділ ететін басты элемент болып табылады. Мұғалімдеріміз бұл бағалау жүйесін қолдана отырып, осы әдістің тиімді жақтарын өз әріптестерімен бөлісті. Олар оқушыларға нақты әрі әділ баға беруге қол жеткізіп, сабақтарда тиімді кері байланыс берудің маңызды екенін тағы да анықтады.
Бұл әдістер оқушыларды қызықтырып қана қоймай, олардың пәнге деген ынтасын оятты. Сонымен қатар, мұғалімдер өз тәжірибелерімен бөлісе отырып, әріптестерімен бірлесе жұмыс істеудің маңыздылығын атап өтті. Тәжірибе алмасу барысында ұстаздар жаңа тәсілдерді меңгеріп қана қоймай, оларды өз сабақтарына бейімдеу жолдарын үйренді.
Осындай жаңашылдыққа бағытталған шаралар ұстаздардың кәсіби біліктілігін арттырып, білім беру сапасын жақсартуға ықпал етті. Мұғалімдеріміздің жаңа интеллект жүйесін тиімді қолдана алуы олардың заман талабына сай екендігін тағы бір мәрте дәлелдеді. Бұл тәжірибе алмасу әрбір ұстаздың дамуына үлес қосып, білім беру саласындағы маңызды қадамдардың бірі болды.
Гүлмира Уалиханқызы Баймахан,
Жамбыл атындағы мектеп-лицейі директорының бастауыш сыныптар жөнінде орынбасары.