2024-2025 оқу жылында мектепішілік жоспарға сай, Т.Ибрагимов атындағы жалпы білім беретін мектебінде қараша айының 4-і мен 29-ы аралығында «Орыс тілі мен әдебиеті, шетел тілі сабақтарында оқушылардың коммуникативті құзыреттілігін және цифрлық технологияларын дамыту» тақырыбында «Полиглот» пән бірлестігінің айлығы өткізілді.
Бұл айлықтың негізгі мақсаты – оқушылардың цифрлық сауаттылығын арттыру және олардың коммуникативті құзыреттілігін қалыптастыру болды. Жоспарға сәйкес, айлық іс-шараларды «Полиглот» пән бірлестігінің ұйымдастыру кезеңінде мектеп директорының оқу ісі жөніндегі орынбасары Байзақ Жаңыл апай таныстырып, бекітті. Айлық жоспарға сәйкес бекітілген айлықтың алғашқы аптасы 13-17 қараша аралығында орыс тілі мен әдебиеті және шетел тілдерінен пән мұғалімдері ашық сабақтар өткізді. Әр ашық сабақта жасанды интеллекттің бірнеше түрлері ChatGPT, D-ID, Magic School, Magic slides, Virbo AI, Gamma AI қолданылып, Wordwall, Kahoot, Flippity сияқты сабақты қызықты өткізуге арналған интернет платформалар мен жаңа әдіс-тәсілдермен жүйелі түрде өткізілді.
18-29 қараша аралығында орыс тілі мен әдебиеті және шетел тілдері пәндері бойынша оқу бағдарламаларын зерделеу, сыныптан тыс жұмыстар, шығармашылық қорғау, шеберлік сыныптары, бақылау диктанттары, сергіту сәттері, баяндамалар және тәрбиелік іс-шаралар өткізілді.
Сондай-ақ айлық барысында білікті ұстазымыз орыс тілі мен әдебиеті пәні мұғалімі Жақсыкүл Партаева «Искусственный интеллект на уроках русского языка и литературы» шығармашылық жұмысын өте жақсы қорғады. Мұнда әрбір жасанды интелектті сабақта қолданудың ең тиімді әдістерімен бөлісті.
«Жасанды интеллект негізіндегі интернет ресурстар және платформалармен шығармашылық сыни ойлауды дамыту» тақырыбында шетел тілі пәні мұғалімі Г.Диханбаева шебер сынып сағатын қорғады. Мұнда ұстаздарымыз Magic school, Magic slide, Virbo, Gamma AI аталған жасанды интеллекттермен қалай жұмыс жасау керектігін шебер түрде көрсете отырып, әріптестермен бөлісті.
Сонымен қатар айлық барысында оқушылар мен мұғалімдерге қызықты сергіту сәті ұйымдастырылып өткізілді. Шетел тілі пән мұғалімдері М.Сералиева мен Ж.Палымова мұғалімдер арасында «Funny time» іс-шарасын ұйымдастырып, мұғалімдерге керемет көңіл күй сыйлады және де мұғалімдер белсене қатысты. Сонымен қатар орыс тілі мен әдебиеті пәні мұғалімдері Ұ.Сырлыбекова мен Л.Исаберген «Литературное кафе» сергіту сәтін аралық сынып оқушыларымен ұйымдастырып, орыс тіліне деген қызығушылықтарын оята білді. Жас талантты ұстаздарымыздың бірі Ғ.Әшірханова 4 «б» сынып оқушыларымен «Be better» тақырыбында керемет іс-шара өтіп, оқушылардың ағылшын тіліне деген қызығушылығын арттыра отырып, керемет көрініс қойылымдар мен ән-күй орындатып оқушылардың белсенділігін арттыра білді. Қараша айының 26-ы күні «Бастауыш сынып оқушыларының бастапқы сөйлеу дағдыларын қалыптастыруға бағытталған зерделеуде, имплициттік оқыту принципін пайдалану» тақырыбында орыс тілі мен әдебиеті пәні мұғалімдері Ж.Партаева мен М.Байдаулетова оқушылардың ой қиялын дамытып, дүниетанымын кеңейтетін құнды баяндама оқыды.
«Білім берудің барлық деңгейінің мемлекеттік жалпыға бірдей міндеттемелері» тақырыбында бірлестік жетекшіміз орыс тілі мен әдебиеті пәні мұғалімі Г.Ысқақова шеберлік сыныбын өткізді. Аталған тақырып бойынша жас ұстаздарға көмекші ретінде оқу бағдарламасының бұйрықтарымен таныстырды. Оқыту процесінде белсенді әдіс-тәсілдер мен технологияларды қолданды.
«Полиглот» пән бірлестігінің жабылу салтанаты 2-11 сынып оқушыларының қатысуымен салтанатты жағдайда өткізілді. Кеш барысында 9 «ә» оқушысы Нұрлан Ердос орыс тілінде «Прекрасное далеко» әнін шырқаса 4 «б» сынып оқушысы Талғат Сая ағылшын тілінде «Hello», 4 «а» сынып оқушысы Әдеш Аяла ағылшын тілінде «Bingo», 4 «а» оқушысы Әшірхан Аида «Rain, rain go away», 9 «а» сынып оқушылары Жайыл Ботагөз бен Сайынбек Аяла «Unstoppable» әндерін жанды дауыста шырқап ерекше қошеметке бөленді. Орыс тілінде 4 «ә» сынып оқушылары «Колобок», шетел тілінде «Red shoes» ертегілері керемет сахналық көрінісі тамашаланып, орыс тілінде 6 «ә» сынып оқушылары «День рождения Маши» атты мюзикл сахналанды. Сонымен қатар аралық сынып оқушылары қазақ, орыс, ағылшын тілдерінде өлең оқылып, оқушыларға викториналық сұрақтар қойылды. 4 «б» сынып оқушылары «Dreamers», 5 сынып оқушылары «Waka, waka» би билеп өз өнерлерін ортаға салды. Кеш соңында мектеп директоры Тынышкүл Мұратқызы қорытындылап, өнер көрсеткен барша оқушыларға алғыс хаттар мен сыйлықтар табысталды.
Айлықтың қорытындысы барысында мектеп директорының оқу ісі жөніндегі орынбасары Жаңыл Байзақ «Полиглот» пән бірлестігі аясында ұйымдастырылған ашық сабақтар мен іс-шаралардың маңыздылығын ерекше атап өтті. Ол барлық іс-шаралардың жүйелі түрде жоспарланып, нәтижелі түрде жүзеге асырылғанын, оқушылар мен мұғалімдердің белсенді қатысуын жоғары бағалады.
Әр ұстаз цифрландыру мен жасанды интеллект технологияларын білім беру жүйесіне енгізу арқылы оқыту үдерісін жетілдіруді маңызды деп санайды. Мұндай тәсілдер оқушылардың танымдық қабілеттерін, шығармашылық ойлауын және коммуникативті дағдыларын дамытудың тиімді жолы болып табылады. Жалпы, «Полиглот» пән бірлестігінің айлығы – заманауи білім беру жүйесінің талаптарына сай өткізілген тың жоба болды. Бұл айлық мектеп ұжымына жаңа технологияларды тиімді қолдану арқылы білім беру сапасын арттыруға, оқушылардың жан-жақты дамуына зор мүмкіндік берді. Осы игі бастама білім беру үдерісінің маңызды құрамдас бөлігі ретінде одан әрі жалғасын табады деп сенеміз.
Ұлбала Батыралы,
Т.Ибрагимов атындағы жалпы білім беретін мектеп КММ шетел тілі пәні мұғалімі.