ҮЗДІК ОҚЫРМАН — РУХАНИ БАЙЛЫҚТЫҢ ЖАРШЫСЫ

Білім мен тәрбие – ұлт бола­шағының негізі. Осы бағытта аудандық Білім бөліміне қарасты “Рахманқұл Бердібай атындағы жалпы білім беретін мектеп” КММ-де “Оқуға құштар мектеп” жобасы аясында өткен тамаша іс-шара оқушыларды әдебиет әлемі­не терең бойлатты.
Жоба аясында ұйым­дас­ты­­рыл­ған «Оқуға құштармыз» атты са­йыс Roombooks орта­лығында өт­ті. Бұл рухани шараның басты ма­қ­саты – жас буынды кітап оқуға баулу, олардың көркем әдебиетке деген сүйіспеншілігін арттыру және талғамды оқырман қалыптастыру. Сайысқа 7-9 сынып оқушылары қа­тысып, өздерінің білімділігі мен тапқырлығын жоғары деңгейде көрсетті.
Әдебиет байқауында Қ.Мұса «Менің атым Қожа», Н.Темірхан «Ертөстік», Т.Әбдік «Оң қол», А.Дәулетбай «Қажымұқан» және Ә.Сүгірбай «Құтты білік» атты шығармаларды шеберлікпен қор­ғап шықты. Әр қатысушы өзіне тиісті материалдарының терең мәнін, көркем­дік ерекшелігін ашып, көрермендер мен қазылар алқа­сының көңілінен шыға білді.
Сайыстың қорытындысы бо­йын­ша оқушы­лардың білім­паз­дығы мен ізденімпаздығы ла­йық­ты бағаланды. Әдебиетке құштар жан­дардың еңбегі еленіп, олар­дың әрқайсысы өз таланты мен шы­ғармашылық қабілетіне сай ма­рапаттарға ие болды. Әсіресе, кітапты терең түсініп, жан-жақты талдаған оқушылар «Үздік оқырман» атанып, ерекше үлгі көрсетті. Белсенділігімен көзге түс­кендер «Белсенді оқырман», ал әдебиетке деген терең білімімен танылғандар «Білімді оқырман» атағына ие болды. Сонымен қа­тар, тапқырлық танытқан өрендер «Тапқыр оқырман», өнерін ше­берлікпен ұштастырғандар «Өнер­лі оқырман» номинацияларымен марапатталды.
Бұл марапаттар – жас оқыр­мандардың еңбегіне берілген лайықты баға ғана емес, олардың болашаққа деген сенімі мен құлшынысын арттыратын шабытты сәттердің бірі болды. Әдебиетке деген махаббат пен ізденіс жолында табысқа жеткен әрбір оқушы­ның жүрегі рухани азыққа толы­ғып, алдағы белес­тер­ді бағындыру­ға деген сеніммен қанат­танды.
Бұл шара жас ұрпақты көркем әдебиетті оқуға тәрбиелеп қана қоймай, олардың рухани әлемін ба­йытып, ой-санасының өрісін ке­ңейтті. Осындай маңызды жоба­лар болашақта да жалғасын тауып, кітаптың құндылығын дәріптеу жалғастырыла бермек.

Гүлназ Жолдасбаева,
Мектеп кітапханашысы.

Жаңагүл Одаманова,
Тұлға тану үйірмесінің жетекшісі.