Бұл жалған дүниеде бауырдың жөні бөлек қой. Біз он ағайынды едік – бес ұл, бес қыз. Өкінішке қарай, соңғы жылдары ауыр сынақтарды бастан өткердік. Осыдан 8-9 жыл бұрын үлкен ағам Шымыр инсульт алып, қатты қиналған едік. Кезінде ауданымыздың спорт саласының өсіп-өркендеуіне сүбелі үлес қосқан, атына заты сай ағамыз төзімділігі мен табандылығының арқасында бұл қиындыққа мойымады. Толықтай сауығып кетпесе де, қайсарлығы мен намысқойлығының арқасында өздігінен қозғалып, далаға өзі шығатындай жағдайға жетті. Оның бұл жеңісі біз үшін үлкен қуаныш болды, Аллаға шүкіршілік айттық. Әрине, бұл жерде бірінші Алланың, екінші білікті дәрігерлердің қажырлы еңбегінің нәтижесінде ағам қатарға қосылды.
Кейде біз дәрігерлерді оңды-солды сынға аламыз, олардың жұмысына көңіліміз толмай, түрлі пікір айтамыз. Бірақ, басымызға іс түссе, дәл сол ақ халатты абзал жандардың алдына барып, жанымызға шипа іздейміз. Себебі, біз үшін сенер, сүйенер жалғыз жан – дәрігерлер.
«Қырсық қырық ағайынды» деген рас екен. Шымыр ағамыдың беті бері қарап, есімізді енді жидық па?- дегенде, өткен жылы күтпеген жерден Шыныбек ағамыз да инсульт алып, миындағы тамыры жарылып, өмір мен өлімнің арасында жатты. Сол сәтте біздің бар үмітіміз дәрігерлерде еді. Оның өмірі қыл үстінде тұрды. Дәрігерлер жанталаса әрекет жасап жатты. Мен олардың әрбір қозғалысын бақылап тұрдым. Бірі дәрі даярласа, бірі оттегі аппаратына қосып жатыр. Қанша жылдық тәжірибесі болса да әрбір науқастың тағдыры олар үшін – үлкен жауапкершілік.
Өмір мен өлімнің арасында бір сәттік айырмашылық бар. Бірі өмір үшін күрессе, бірі тағдырға мойынсұнады. Ал, осы екі арада жанкешті күрес жүргізетін сөзсіз ақ халат киген абзал жандар.
Олар уақытпен санаспайды. Олар өз өмірін өзгенің өмірін сақтап қалу үшін арнайды. Сол бір ауыр сәттерде мен дәрігерлердің жай ғана кәсіп иесі емес, шын мәнінде адам жанының сақшысы екенін түсіндім.
Шүкір, аудандық аурухананың жансақтау бөлімінің меңгерушісі Файзулла Серікбайұлы, анестезиолог-реаниматолог Абай Дүйсенбиевтер ағамызды бір ажалдан арашалап қалу үшін аянбай еңбек етті. Облыстан білікті мамандар шақыртып, қажетті барлық шараларды уақытылы жүргізді. Дәл осы дәрігерлердің өз мамандықтарына деген адалдығы, адам өміріне деген жанашырлығы ағамызға екінші өмір сыйлады. Ерекше айта кететін бір мәселе, мұндай күрделі ота аудандық ауруханада бірінші рет жасалды және оның сәтті жасалуы сөз жоқ, дәрігерлердің шеберлігі. Қазіргі таңда ота жасалған Шыныбектің бір жыл ішінде өз аяғымен жүріп-тұруы — оның ерік-жігерінің, ең бастысы дәрігерлердің еңбегінің жемісі деп білемін. Толық айығып кету үшін уақыт пен шыдамдылық қажет. Бірақ, осындай жетістікке жеткеннен кейін бізге бәрі мүмкін сияқты көрінеді. Дәрігерлердің жұмысы — тек науқасты емдеумен шектелмейді.
Олар ауыр халдегі науқастың қасында отырып, оған рухани демеу береді. Жақындарына үміт ұялатады. Бірнеше сағатқа созылған оталар, ұйқысыз түндер, шексіз жауапкершілік – мұның бәрі дәрігерлік мамандықтың жүгі.
Бұл мамандыққа әркім келе бермейді. Себебі, бұл — жүрек қалауымен ғана таңдалатын жол. Адам жанына араша түсетін, кішкентай баланың өмірін сақтап қалу үшін жанын салып жұмыс істейтін жандарды қалай құрметтесек те жарасады.
Дәрігер болу — тек антына адалдық емес, ең алдымен жүрек қалауымен атқарылатын қасиетті қызмет. Ақ халатты абзал жандар күн-түн демей адам өмірін сақтауға күш салып, өз еңбегімен үміт отын жағатыны сөзсіз.
Бүгінде медицина ғылымы дамып, емдеудің түрлі әдістері жетілдірілуде. Бірақ, қандай заманауи құрал-жабдық болса да, дәрігердің жүрегі мен мейірімі науқасқа — басты шипа. Олар науқастың беті бері қараса ғана тынышталады.
Жасыратыны жоқ, кейде дәрігерлердің еңбегі еленбей жатады. Бірақ, олар мадақ күтпейді. Олар үшін ең үлкен марапат — науқастың жазылып, үйіне оралуы. Дәрігер — жай ғана мамандық емес, бұл — өмірге деген адалдықтың белгісі.
Мен ағаларымның өмірін сақтап қалған дәрігерлерге басымды иемін. Олардың еңбегі — ерлік, олардың әрбір ісі — құрметке лайық. Ақ халатты абзал жандар, сіздерге отбасымыздың атынан және өз атымнан аудандық ауруханның меңгерушісі Файзуллаға, осы мекеменің анестезиолог-реаниматологі Абайға және ағам ауруханада жатқанда ем-шараларын жүргізген білікті дәрігерлер Бағдат пен Әскербекке, сондай-ақ өз істерінің шеберлері Раушан, Әшіркүл бастаған мейірбикелерге шексіз алғысымызды білдіреміз! Сіздердің қажырлы еңбектеріңіз бен өз мамандықтарыңызға деген адалдықтарыңыз мыңдаған жанға өмір сыйлап, мыңдаған шаңырақты шаттыққа бөлеуде. Қиын да жауапты қызметтеріңізге басымды ие отырып, жұмыстарыңызға толағай табыс, өздеріңізге зор денсаулық, отбасыларыңызға амандық тілеймін!
Мейрамбек Қашқынов,
аудандық №2-балалар мен жасөспірімдер спорт мектебінің директоры.