Жуырда Талапты ауылдық округіне қарасты Шытты ауылында фельдшерлік-акушерлік тірек пайдалануға берілді. Шыттылықтардың қуанышын бөлісуге аудан әкімі Қайрат Жолдыбайұлы арнайы барып, нысан құрылысының аяқталуын асыға күткен ауыл тұрғындарын құттықтады.
Аудан басшысы құттықтау сөзінде: «Ауданымызда жаңадан ашылып жатқан медициналық нысан халқымыздың әлеуметтік жағдайын жақсартуға бағытталған нақты қадамдардың бірі. Бұл нысан ауыл тұрғындарының денсаулығын нығайтып, медициналық қызметтің қолжетімділігін арттыруға септігін тигізеді. Мемлекетіміздің ең басты байлығы – адам. Сондықтан әр азаматтың денсаулығы мен өмір сапасын жақсарту – басты міндетіміз. Осы тіректің ашылуы арқылы сіздер сапалы медициналық көмек ала аласыздар. Мұнда алғашқы медициналық көмек көрсетуге арналған барлық жағдай жасалған. Сондай-ақ кәсіби мамандардың қызметі де ауыл тұрғындарына қолжетімді болмақ»,-деді.
Салтанатты жиында Түркістан облыстық денсаулық сақтау басқармасы басшысының орынбасары Бауыржан Сатыбалды жаңа ғимараттың ашылуымен құттықтап, жұмысына сәттілік тіледі.
Мұнан соң 80 жастан асқан ауылдың қариясы Өтебай Әбдіхалықов игі істің басы-қасында жүріп атсалысқан азаматтарға ауыл тұрғындары атынан шынайы ризашылығын білдіріп, ақ батасын берді.
Шара барысында жаңа нысанның лентасы қиылып, қонақтар заманауи құрал-жабдықтармен жабдықталған жаңа нысанның ішін аралап көрді.
Айта кету керек, Шытты ауылында 1300-ден астам тұрғын бар. Ауыл тұрғындары бұрындары басы ауырып, балтыры сыздаған кезде аудан орталығына, Шәуілдір ауылына баратын. Енді тұрғындар үшін жаңа медициналық тіректе мамандар қызмет көрсететін болады.
Аудан әкімінің баспасөз қызметі.