Жуырда аудандық орталықтандырылған кітапханада жерлесіміз, елімізге белгілі сатирик, Қазақстанның еңбек сіңірген қайраткері Көпен Әмірбектің 75 жылдығына орай «Сатираның сайыпқыран сардары» атты еске алу кеші өтті. Аталмыш шараға арнайы қонақ болып сатира сардарының бауырлары Әндиша Әмірбекова, Ләззат Түкібай, Азат Әмірбек, Бақытжан Сапарбай сондай-ақ құрдастары Жұмахан Әбдіқадыров пен оның жұбайы Ботакөз Бабашовалар қатысты.
Еске алу кеші Көпен Әмірбекұлының өмірін бейнелейтін бейнероликтен бастау алды.
Жиында алғаш сөз алған Ж.Әбдіқадыров кеш қонақтарын құттықтап, Көпен Әмірбекұлының қазақ сатирасына қосқан зор үлесін жан — жақты атап өтті. -«Көпен Әмірбек арамызда жүргенде биыл 75 жасқа толар еді. «Отырарда туып, аты алты Алашқа танылған дарын иелерінің қатарында сатирик Көпен құрдасымның есімі ерекше. Отырар жұрты өз перзенттерін әрдайым құрмет тұтып, еңбегін ешқашан ұмытпайды. Дарынды тұлғаның өнегелі өмірін ұрпаққа насихаттап, қазынасын алтын қорда сақтайды. Қазақ сатирасын өрге жүздірген Көпен Әмірбекұлының жаны жәннатта, ұрпағы аман болсын», – деді.
Мұнан соң Көпен ағамыздың сыныптасы Ботакөз Бабашова сөз алып, ол өз сөзінде -«Көпен Әмірбек дегенде оның жүрекке жылы әзілдері, шымшыма мысалдары, жеңіл қалжыңдары еске түсіп, еріксіз езу тартқаныңды өзің де байқамай қаласың. Қоғамдағы олқылықтар мен орынсыз істер, Абай айтқандай ызаланып күлуге тиіс жағымсыз жайттар Көпен ағаның назар – нысанасынан тыс алған жоқ. Күнделікті тіршілікте және өз шығармаларында юмордың түр-түрін қолданудың майталман маманы. «Қалжың сөздің қасқыры, Жоқ ешкімге қастығы» дегендей, табан астында тауып айтатын тапқыр тіркестері арқылы аты аңызға айналған жан. Көпеннің өзі де, көзі де, сөзі де күлдіреді. Әр сөзі ғана емес, әр әрпі езу тартқызады», — деді.
Сондай-ақ, шарада туыстары Көпен Әмірбекұлының балалық шақтағы естеліктерімен бөлісіп, осындай мазмұнды іс-шараны ұйымдастырып отырған кітапхана ұжымына және сол ұжымның басшысы Роза Пернебайға арнайы алғысын білдіріп, қызметтеріне табыс, дендеріне саулық, отбасыларына амандық тіледі.
Кітапхана қызметкерлері Пашан Мақсат, Шерехан Дариғалар Көпен ағамыздың әзіл — сықақтарын оқып, көпшілікті күлкіге бөледі. Жиын соңында естелік суретке түсіп, қонақтар мерекелік көңіл-күймен тарқасты.
Ия, расымен де Көпен Әмірбекұлының әрбір шығармасы қоғамдағы түйткілдерді әзілмен астарлап жеткізіп, халықты ойландыруға бағытталған. Белігілі сатирик «Қымызхана», «Тамаша» ойын-сауық отауының белсенді авторы ретінде, сондай-ақ өзі құрған «Көпен келе жатыр!…» атты сатиралық театрымен көрерменге кеңінен танылды. Орыс әдебиетінің классиктері И.Крылов, С.Михалков, С.Маршактың мысал-мысқылдары мен лезгин сатиригі Жамидиннің және өзбек әзілкеші Абдулла Қаһардың бірсыпыра сықақ өлеңдерін қазақ тіліне аударды. «Аты жоқ кітап», «Алып», «Тілім қышып барады», «Қысыр әңгіме», «Мың бір мысал», «Ауызбастырық», «Өзіңді танисың ба?», «Көпен келе жатыр!…», «Із», «Көкемнің көзі», «Па, шіркін, пародия!…» атты әзіл-сықақ, сын мақалалар кітабының авторы. Президент гранты мен «Парасат» орденінің иегері, Халықаралық «Алаш» әдеби сыйлығының лауреаты. Оның қаламынан туған небір өткір туындылар қалың оқырманның көңілінен жай тауып, талай әзіл-сықақ театрға арқау болды. Жақсы адамның ісі де, сөзі де, өзі де көп көңілінде өмір сүреді. Көпен сондай адам. Қазақ барда, күлкі мен әзілдің қадір-қасиетін білетін жандар бар кезде көп көңіліндегі Көпен жасай береді.
Нұрмахан Нурилдаұлы.