Аудан әкімі Қайрат Жолдыбайұлының аудан тұрғындарымен кездесуі аудан орталығы Шәуілдір ауылында өтті. Кездесуде аудан басшысы ағымдағы жылы атқарылған жұмыстарды баяндап, алда тұрған міндеттерді атап өтті. Биылғы жылы Шәуілдір ауылында да ағымдағы жылы ауқымды жұмыстар атқарылды. Атап айтқанда Т.Бозшабаев, Д.Алтынбеков, Н.Оңдасынов, С.Құрманбеков, Қ.Сәтбаев, Бозінген көшелері асфальтталып, ұзындығы 4 шақырым жолға тас төсеу жұмыстары атқарылған. Сондай-ақ Қамбаров, Д.Сарқұлов, Ф.Садықбекқызы, Сүлейменов, Нәлібаев, Рүстемов көшелері жарықтандырылып, балалар ойын алаңшасы мен спорт алаңшасы салынды. «Жайлы мектеп» ұлттық пилоттық жобасы аясында Шәуілдір ауылындағы 600 орындық мектеп құрылысы аяқталып, пайдалануға берілді. Ағымдағы жылы да аудан орталығын абаттандыру жұмыстары жалғасын тауып, Шәуілдір ауылы, Жаңа мөлтек аудандағы көшелерге, Т.Әубәкіров көшесінің қиылысы, М.Әжібеков көшесі қиылысы көшелеріне орта жөндеу, Жайлы мектеп маңындағы көшеге асфальт төсеу, аяқ жол салу, жарықтандыру секілді жұмыстар атқарылады деп жоспарлануда. Кездесуде есепті баяндамадан соң ауыл тұрғындары тарапынан ауыл ішіндегі дренаждарды жөндеу, жайылымдық жер беру, жолдарды жөндеу, медициналық көмек алу секілді бірқатар сұрақтар қойылып, тұщымды жауаптар берілді. Аудан басшысы айтылған ұсыныс-пікірлердің барлығы хаттамаға енгізіліп, заң аясында тиісті жұмыстар атқарылатынын айтып өтті. Шәуілдір ауылындағы қорытынды жиында ауыл ақсақалы Шайырбек Айжарықов аудан көлемінде атқарылған жұмыстарға оң бағасын беріп, ел игілігі жолында қызмет етіп жүрген азаматтарға ақ батасын берді.
«Отырар ақпарат».
