Ұлттық құрылтай – мемлекет пен қоғам арасындағы өзара байланысты нығайтатын маңызды қоғамдық институт. Оның басты ерекшелігі – халықтың ұсыныстары мен пікірлерін тыңдап қана қоймай, оларды нақты шешімдер қабылдау үдерісіне енгізуге мүмкіндік беруінде. Сондықтан Құрылтайды қолдау – тек бір жиынды қолдау емес, елдің тұрақты дамуына, қоғамдық келісімнің нығаюына және ортақ жауапкершіліктің артуына үлес қосу деген сөз.
Соңғы жылдары қоғамда білім беру, денсаулық сақтау, жастар саясаты, ауылды дамыту, кәсіпкерлікті қолдау және ұлттық құндылықтарды сақтау мәселелері кеңінен көтеріліп келеді. Осындай өзекті тақырыптардың Ұлттық құрылтай алаңында талқылануы олардың жан-жақты қаралуына және тиімді шешімдердің қабылдануына ықпал етеді.
Құрылтайдың тағы бір маңызды ерекшелігі – әртүрлі сала өкілдерінің бір үстел басына жиналуы. Ғалымдар, ұстаздар, мәдениет қайраткерлері, кәсіпкерлер, жастар және азаматтық қоғам белсенділері ортақ мақсат жолында пікір алмасып, елдің болашағына қатысты ұсыныстарын білдіреді. Мұндай ашық диалог қоғамдағы сенімді күшейтіп, халық пен билік арасындағы байланысты нығайтады.
Елдің болашағы тек мемлекеттік органдардың жұмысына ғана емес, әр азаматтың белсенді ұстанымына да байланысты. Сондықтан Ұлттық құрылтайдың бастамаларын қолдау – еліміздің дамуына бейжай қарамайтын әрбір азаматтың ортақ ісі. Бірлік пен өзара түсіністік болған жерде тың бастамалар жүзеге асып, халықтың әл-ауқатын арттыруға бағытталған нақты нәтижелерге қол жеткізуге болады.
Ләззат Түкібай,
ұстаз.